Supersberger . An schean Tog
Eine gewisse Schwermut durchzieht wie ein roter Faden die Gedichte von Franz Supersberger. Verwurzelt im Land Kärnten, schreibt er über Tradition, Alltag, Einsamkeit, Sein und Schein in seiner Umgebung. Die Gedichte enden bisweilen unerwartet lapidar. Eurojournal
Franz Supersberger, 1951 in Ferndorf geboren, lebt als Kaufmann in Arnoldstein, Kärnten. Veröffentlichungen in verschiedenen Literaturzeitschriften und Lesungen im ORF. Regelmäßige Veröffentlichung von Mundartgedichten in der österr. Dialektzeitschrift „Morgenschtean“ und auf den Internetseiten von www.franzstelzhamer.at und www.e-stories.de
Franz Supersberger wurde in Ferndorf geboren und hat schon als Jugendlicher mit dem Schreiben begonnen. Nach der Ausbildung zum Buchhändler war er selbstständiger Kaufmann in Arnoldstein. Heute lebt er als Buchhändler in Muse in Villach /Judendorf. Sein literarisches Schaffen wurde im Hörfunk und in Literaturzeitschriften, sowie in mehreren Büchern veröffentlicht. Er ist Mitglied des Kärntner Schriftstellerverbandes, der Interessengemeinschaft Österreichischer Autoren und der Literaturplattform Buch13. Franz Supersberger ist Autor des Blogs schlagloch. Das Blog wird vom Deutschen Literaturarchiv Marbach langzeit archiviert.
Franz Supersberger
AN SCHEAN TOG
MundArt
Nachdruck oder Vervielfältigungen, auch auszugsweise, bedürfen der schriftlichen Zustimmung des Autors.
C 2005 Franz Supersberger
AN SCHEAN TOG . . .
IS ERSTE MOL
I woaß nimma woas
i da olls dazöhlt hon,
wia mir zwoa is erste mol
spaziern gongan san.
I hon Ongst ghobt,
doß wonn i zan redn aufhear
du ma davongeahst.
Kana hot in ondan gfrogt,
wia olt a is.
Monche Schmerzn san im
Thermalbod nit bessa woarn,
erst donn, wia mir zwoa
zan redn ongfongan hom.
De Vurstellung, doß
de Liab varrinnen kennt,
hot uns weahtoan…
AUSZIAGN
Vur lauta Onsponnung
mecht i om liabstn
vom Stuahl aufsteahn
und ausn Zimma auße geahn.
De Wend ruckn imma
gleima zomm.
Vurm Fensta foahrn
de Autos mit hundat
Sochn vurbei, harinan
fong i on zan Schreibn.
Des hast mi ausziagn
und de foltige Haut herzagn.
I woaß nit, wer ma dabei
zuaschaut…
ALLANSEIN
Um nit allansein
in de Stodt einefoahrn,
iban Hauptplotz geahn,
in fremde Gsichta schaun.
Vur de Schaufensta steahn,
mit de Sochn nix onfongan kennan,
in a Cafe einesitzn und
Zeitungen onschaun.
Bam Hamfoahrn hots gregnat…
NOCHT
In da Nocht weckt mi
a Voglschra, a Krah
zabricht dos Fensta.
De Ongst sitzt auf
da Bettkantn.
Mit stoarke Schmerzn
woch wearn,
a Gfühl wia zan Schterbn.
Den Bsuch von de
Krah in da Fruah
hon i nit wolln,
se san von sölba kemman.
Seitdem homs kan
Tog ausglossn…
AN SCHEAN TOG
KOPFSCHMERZN
OHRNSCHMERZN
ZOHNSCHMERZN
PARKEMED
HOLSSCHMERZN
LIABSSCHMERZN
BRUSTSCHMERZN
THYREX
MOGNSCHMERZN
NIERNSCHMERZN
BUSCOPAN
KREIZSCHMERZN
HÜFTSCHMERZN
KÖRPASCHMERZN
ASPRO
AN SCHEAN TOG NOCH…
BSETZT
In da Nocht umormt
mi di Ongst,
da Frost fongt
mi zan Liabn on.
De Ongst vur da Nocht
konn i ma ausredn,
de Ongst bei Tog
vurm Lebn,
weard i nit
so glei los.
Dei Telefon is bsetzt…
GROD
Grod weil ma uns
schoan so long kennan,
grod weil ma imma guat
mitanond auskemman san,
grod weil ma uns
imma ols dazöhln,
grod weil ma uns
bade beim Redn
schwar toan,
grod desholb getrau
i mi nit sogn,
doß i di mog…
LIAB
Dos Morgnroat vadrängt
de schlechtn Tram
von da Nocht, es
leitet dos Telefon.
Obwohl i ka Lust hon
mit dir zan Redn,
legst du nit auf.
Dei woarme Stimm beruhigt
mei kronks Herz.
Du vasprichst ma dei Hülf
firn Tog und fir de Nocht,
fir a Dosein ohne Gscher,
nur mei Liab
wüllst du dafir hobn…
SOMSTOGNOCHT
Om Sunntogvurmittog
des Leintuch und in
Gulda wieda in Kostn
eineraman, weil
i di Somstognocht
nit getroffn hon.
Om Telefon klingt
dei Stimm wia da
Klong von ana Zithasaitn,
mit an jedn Sotz
ruck ma nächa zomm,
i spir dein Mund.
Wonn i mei Hond ausstreck
spir i a kolte Mawa…
VAWÖHNT
Du host mi in
da Fruh mit an
Kaffee vawöhnt,
mir den Gortnstuahl
in Schottn gstöllt,
auf mei Gsundheit
gschaut, mir gsogt
wia schean und
stoark i bin.
Monchmol is mir
bei dir so eng woarn…
WEITALEBN
Auf da hiagan
Bettkantn sitzn,
daweil du dazöhlst
vom nimma ausholtn
kennan, von da Ongst
vurm Weitalebn,
von deina Sehnsucht
nochn Schterbn.
Daweil möcht i da
a Bussl auf deine
schwoarzn Hoar unta
de Ochsln gebn…
WOCHN SPÄTA
Wochn späta host du dazöhlt
wia schean es in da
Psüchiatri gwesn is,
wo ane fir di ondre
dogwesn is,
wo ane da ondan zuaheart,
wo kane de ondre
ausgnutzt hot.
De Freind von dir hom
di imma ausgnutzt,
kana hot di richtig
gern ghobt.
I konn di vasteahn,
wenn du wieda zruckwüllst,
Wochn späta…
FURTGEAHN
De Muata hot beim Suhn
in da Stodt ongrufn,
er soll hamkemman,
da Vota is kronk, er steaht
vom Bett nimma auf, da Pforra
is a schoan dogwesn.
Wia da Suhn kemman is,
is da Vota beim Kuchltisch gsessn,
mit ana Deckn iba de Schultan,
a Teescholn vur seina und
hot de Zeitung glesn.
Glei amol is da Orzt kemman
und hot gmant, da Vota soll
sich im Spittol untasuchn lossn,
da Suhn kenntat ehn glei mitnehman.
Da Vota hot nit mitfoahrn wolln,
er hot vurm Spittol Ongst ghobt,
mon hot ehn oba dazu übaredat.
Vurm Furtgeahn hot sich da Vota
in da Kuchl umgschaut und
is nimma zruckkemman…
VOTA
Nit wohr hobn wolln dos
in den Sorg da Vota drin is,
und sei Lebn zan End.
Aus da neichn Toatnhalle
weard a aufegfihrt aufn
neichn Friedhof.
Da Pforra fongt zan predign
on, von Trost, Kroft und
von da Aufastehung,
daweil da Sorg ins Grob
obeglossn weard…
MUATA
Da Muata ehrne Augn
schaugn gonz lebendig
aus ehrn Gsicht,
de Haut tuat sich um
de Wonganknochn sponnan.
Weils foast nix mehr heart
list se mit ehrne Augn
de Wörta von mein Mund.
Zan selba aufsteahn vom Bett
is se schoan zschwoach…
BSUCH
I hon de Muata im Spittol bsucht
und hon ehrne Händ gholtn,
de Orm woarn schoan gonz dinn.
Da Vurhong vom Fensta
is za Seitn gschobn gwesn,
sodos se auf de Sunnseitn
aufegsehgn hot.
De Herbstsunn hot gscheint,
es woar a stills Lächln auf
ehrn Gsicht.
I hon zua ehrn gsogt,
du wirst bold amol daham
vurm Haus auf da Bonk
in da Sunn sitzn.
Do hots ehrn Kopf gschüttlt
und an klan Schluck
von ehrna gliebtn Frucade gmocht.
Sie is glei miad woarn
und eingschlofn.
A poar Tog späta
is se gschtorbn…
SCHTERBN
De schlechtn
Schtroßnvahältnisse hom
ban Autofoahrn ka hohe
Gschwindigkeit dalabt.
Es hot stoark gregnat und
späta zan Schneibn
ongfongan, fir de Joahreszeit
vül zu frih.
Des Kronkhaus hot
ongrufn, i miaßat schnell
kemman, won i de Muata
lebenda sehgn wüll,
se liegt im Schterbn.
I hätt da Muata gern
nochamol woas liabs gsogt
oba i bin zspot kemman,
ehrne Händ woarn noch woarm.
I hon ihr fir olls gedonkt
und gsogt, drübn gibt’s
kane Schmerzn mehr…
DA SCHROA
DA KRONKN
DA HUNGRIGN
DA EINSOMEN
DA MISSHONDELTN
DA VAZWEIFELTN
DA SCHLAFLOSN
DA STERBENDN
DA KINDALOSN
DA HILFLOSN
DA VATRIEBENEN
DA ORBATSLOSN
DA BEHINDERTN
DA SCHROA LEBT…
SCHMERZN
Wia de Schmerzn im Kreiz
kann aufrechtn Gong alabt hom,
hon i auf de Frog, wia geahts,
nimma glocht und gsogt,
mir geahts guat.
I wüll kane Schmerzn hobn,
i geah zum Fochorzt,
der schickt mi ins Spittol,
i kriag ane Infusionen,
es kimmt zu ana Oparation.
Von stoarke Schmerzn
woch wearn,
a Gfühl wia zan Schterbn.
Imma noch san de
Schmerzn do und
richtn sich ein zan Bleibn…
GLOSHAUS
A Vatreta wortat im Gschäft,
a Einkeifa is om Telefon,
de Frau Gerda wüll an
Vorschlog von mir,
da Vakeifa frogt, kemman
nächste Wochn de
neichn Fliesn?
Es is Trubl im Betrieb,
i schau aus mein Gloshaus
dem Treibn zua…
SHOPPING CENTA
Hintan Kuchltisch hom
sich de Prospekte von
de Shopping Centa gsommlt,
jedn Tog hot da
Brieftroga neiche gebrocht.
Da Oma ehrne Schuha san
iba zehn Joahr olt…
NOCHBOAR
A Bekonnta is mit
sechsevierzg Joahr bei
an Autounfoll vaunglickt,
im Fruhjoahr is da Nochboar
mit dreiesechzg Joahr on
an Schlogonfoll gschtorbn.
Do hon i gspirt, doß
da Toad mei Nochboar is…
LIABE WÖLT , GUATE NOCHT . . .
MARTIN
Seit sein Schualobschluß
steaht da Martin ols Vakaifa
hinta ana Budl.
A poarmol hota miasn sein
Orbatsplotz wechsln,
weil de klan Gschäfta von
de Einkaufscenta vadrängt
san woarn.
Om Sunntogvurmittog sitzt da
Martin beim Stommtisch im
Dorfgosthaus
und auf olle Frogn ontwortat er mit:
Grüaß Gott, grüaß Gott…
SINN
Iban Sinn vom Lebn,
iba de Zukunft vom Urt
oda goar von dera Wölt
is schoan vül gredat und
nochgedocht woarn.
Vom Tischla, vom Bawa,
vom Pforra und a vom Professa.
Da Gärtna sogt,
wonn mon ehn danoch
frogt, liabe Wölt,
guate Nocht, guate Nocht…
BAIRIN
Long hot de Bairin mitn Bawa
a in da Rentn dos Haus
und den Schtoll sauba gholtn.
Es woar imma epas zan toan.
Von ana Stund auf de ondre
hot da Bawa ins Spittol miasn,
bold drauf isa gschturbn.
Ihr Lebtog hot de Bairin
vül und schwar gorbat,
a Kind nochn ondan is kemman
und a wieda vom Hof gongan,
kans is gebliebn.
A Föld nochn ondan
is vakaft woarn,
dos hot weah toan…
RENTN
Seit da Rentn hot de Bairin
a klane Wohnung im Bawahaus
ghobt.Vom Schlofzimma hot se
in Hof obegsehgn, aus da
Kuchl hot se an
schean Blick ins Tol obeghobt.
Vur de Fensta is olleweil woas
gschehgn. In da Wohnung hot se
imma a Klanigkeit zan toan ghobt
und oft woar a Bsuch do.
Heit sitzt de Bairin im Oltasheim
in an klan Zimma im Rollstuahl,
in gonzn Tog laft da Fernseha.
Sölba red se nix mehr,
nur amol hot se zan Bsuch gsogt,
se mecht wieda ham…
MÖSLVOTA
Da Möslvota is seit
ana Wochn im Spittol glegn,
mon hot ehn a poarmol untasuacht,
oba es is nix ernsts gfundn woarn.
Er hot vom Bett nimma
aufsteahn wolln.
Dos Weitalebn hot fir ehn kan
Sinn ghobt, wo de Jungan zhaus
ols vakaft hom, de Földa,
dos Vieh, den Wold.
Gessn hota a nix mehr…
RAUTA VOTA
In an ondan Tol hon i
bei ana Busholtestöll
in Rauta Vota mitn
krumman Ruckn steahn gsehgn.
I bin mitn Auto steahnbliebn
und hon ehn gfrogt,
ob i ehn mitham nehman
soll. Do hot sei Hond aufn
Higl aufegezagt.
„Seniorenheim“ ist om
Haus gstondn.
Wieda daham im Urt bin
i bei de Rauta vurbeigfoahrn,
om umbautn Haus is
„Gästepension“ gstondn.
Wonn de Gäst kemman,
wird da Plotz fir de
oltn Leit knopp…
KAISA
In da Mittn von da Haisazeiln
hot zu ebana Erd de Frau
mit de fettn Hoar und de
Foltn im Gsicht gwohnt.
Da schmole Körpa und
de schean fein Händ
hom nit zan oltn Gsicht passt.
Es woar, ols weans zwoa
vaschiedene Leit.
Om Obnd hots bei
offanan Fensta und
bei Kerznschein Klavier
gspült. Unta Togs is im
Urt kreiz und quer gronnt,
wia a valurenes Vieh.
In de Gschäfta hots ehrne
Gedonkn folln glossn,
so wia den:
Da Nochboar is so ibaflissig
wia da Kaisa…
KRIAG
Dos Belln vom Hund
hot in Nochboar gstert,
de Rosn de iban Zaun
gwochsn san
hota obgschnittn.
Im Gosthaus hota sich
driba aufgregt,
wia zwoa Nochboarvölka
gegnanond Kriag fihrn kennan.
De Alogscheine mit
de Spendnaufrufe
fir de Kriagsopfa,
fir de Hungandn,
de Erdbebenopfa
hota vahazt.
Es gibt sovül Noat
und Elend a bei uns do.
Den Alogschein fir
di Inlondshülfe hota wegghaut…
KATZLMOCHA
Seitdem de Italiena
iba de Grenz kemman
und bei uns in
de Gosthaisa und Gschefta
sena Göld dolossn,
hot kana mehr iba
sena gschimpft und
se Katzlmocha ghaßn…
FLICHTLINGSKINDA
Ba da Orbat hom de
Mannda driba gschimpft,
doß olle Flichtlingskinda an
Plotz im Kindagortn kriagn.
Om Obnd hom de Mannda
in da Schtroßn, wo de Flichtlinge
a Untakunft gfundn hom,
Flichtlingsfraun gschaut.
Mit ana Göldspendn hot
mon sich vom Onblick
da Flichtlinge im Urt
freikafn kennan…
FLOHMORKT
Aus zwoa Lautsprecha hot
de Volksmusik durchs
Dorf gjodelt. In ana Eckn
vom Dorfplotz homs Brotwirschtln
und Kotlett gegrüllt
und Bier ausgschenkt.
Hinta de Standln san de
Helfa im Trochtnonzug
gstondn. De Sunn hot
vom Himml obaghazt.
De Dorfleit hom in de
Flohmorktsochn umagwühlt,
oba vur lauta Gschamigkeit
nix kafn getraut.
Om Nochmittog san
de Gostorbeita aus
da Stodt kemman…
FOARBN
Ols Kind kimmst
in de Schual,
do woaßt du nit,
host an Rotn, an Schworzn
oda an Blobm ols Direkta.
Ols Junga geahst du
za an Varein, do merkst
schoan sölba, ob du bist
bei de Rotn, de Schworzn
oda de Blobm.
Ols Awochsena suchast
a Orbat, a Wohnung
oda host sunst ane Surgn,
do frogns di zerst
wölche Parteifoarb du host…
KRONK
Monchmoal weards ihm zvül,
donn geaht a von da Orbat weg,
legt sich auf a Bonk im Park.
De Autos nennt a an Fluch,
de Schipistn toan de
Olmwiesnan zastern.
Oft weard iba ehn gredat,
der is im Kopf kronk.
De an foahrn mitn Auto
hundat Meta zan Zigarettn kafn,
de ondan schmeisn de neichn
Schuah aufn Müll, es is grod
wegn da Foarb. Ausn Park
soll a Parkplotz wearn.
Er glabt de Menschn san kronk…
OBND
Om Obnd ziagt sich
dos Leben von da Schtroßn zruck
und nimmt vurm Fernseha Plotz,
de Vurhäng san zuazogn.
Mit an Hunga zan Tisch
zuawesitzn, frogn woas es
zan Essn gibt,
daweil de Ongst vurm
morgign Tog zuanimmt.
In de Gosthaisa steahn
a poar on da Budl und
schaun ins Glasl…
VAKAIFARIN
Ols Vakaifarin zagst imma
a freindlichs Gsicht,
a wonn du mitn Freind
Streit ghobt host,
bade Fiaß ongschwolln san
und du de vüle Orbat nit schoffst.
Long host du gstrebt
noch Glick, noch Onsehn
noch Göld. Heit freist di
iba an schmerzfrein Tog…
SPEARMÜLL
Vurm Haus aufn
Geahsteig steaht a Bett,
a Schronk, a blinda Spiagl
und a Kuchltisch.
A ongschloganes Woschbeckn,
de Amatur von ana Bodewonn
und vaschiedane Lompn.
A poar olte Kochtöpf, Bichar
und de „Bunte“ von fünf Joahr.
Bold kimmt de Müllobfuhr und
fiahrt den Hausrot da vastorbanan
Schneidamasterin weg…
VAGESSN
Jede Pforrei hot senan
Friedhof. De Ane an klanan,
de Ondre an greaßarn,
da Ane liegt auf an Higl,
da Ondre vurm Dorf.
De an hom an Grobstan
aus Granit, de ondan
an aus Marmor und
ondre a anfochs Holzkreiz.
Es is a Kompf gegn dos Vagessn…
FUCHZG JOAHR
Fuchzg Joahr späta hot
a gebüldeta öltara Herr
gmant, dos de heitige
Jugend an Orbatsdienst
brauchat, so wia untan
Hitla.
Sechzg Joahr späta hom
de Hitlaonhänga behauptat,
dos von de Nazis kane Judn
in Viehwaggons in de KZs
vaschickt san woarn.
Se hom gsogt, doß noch
im vierevirzga Joahr
jidische Fraun in Pelzmäntl
im Speisewogn gsessn san
und noch Amerika ausgreist san…
DACHAU
In da Eingongshalle
vom KZ Dachau hängt a
groaße Kortn von Europa
mit vüle Punkte drauf,
von da Nordsee bis
oba zan Mittelmeer.
Dos san in da Nazizeit
ols KZs und deran
Außnloga gwesn.
Es schaut aus,
ols wär Europa
von an Hautausschlog
befolln gwesn…
STEIN
Bei de Gedenkkreiz
fir de politischn Opfa
da Nazizeit in Stein hot
a junga Herr zu mir gsogt,
doß in de KZs de
Häftlinge a on an
natirlichn Toad gschtorbn san.
A natirlicha Toad woar
on Hunga, Erschöpfung,
oda Mißhondlungen schterbn…
ZWOATE HAMAT . . .
HAMAT I
MEI HAMAT
IS MEI HEMAT.
MEI HEMAT
IS MEI HAMAT…
HAMAT III
Vurbeifoahrn on da Fabrik,
mit da Sehnsucht im Koffaraum
noch da Hamat ols Kind.
De schmole Bergschtroßn schiaßt
is Auto aufe wia a Vogl, de Seel
is no weita vuraus.
Gonz longsom um de letzte Kurvn
umafohrn und in Hof einebiagn.
Im Schtoll san kane Vieha mehr,
dos Hei von de vurign Joahr
modat aufn Tennbodn dahin.
Om Motormäher hängan de
Spinnwebn. Es is still woarn
im Schtoll harin…
MOCHA
Wia de Mocha wieda
im Extrastüberl vom
Dorfgosthaus zomm gsessn san
und driba gsprochn hom,
man miasat fir de Hamat
woas toan,
an greaßan Lift,
an Golfplotz,
a neichs Schwimmbod,
do homs mit Hamat
ehrna Brieftoschn gmant…
ZWOATE HAMAT
Wias Erbtal vasoffn
gwesn is,
da Bruda gheirat hot
und er vom Hof
geahn hot miasn,
do hota im Woarteraum
vom Bohnhof sei
zwoate Hamat gfundn…
VASTÄNDIGUNG
Za Vaständigung zwischn de
Nochboarstootn hots gemeinsome
Liedaobende, Feiawehrfeste
und Spurtvaonstoltungen gebn.
De Politika hom
scheane Redn gholtn
und Freindschoftsbsuche gmocht.
Za Vaständigung zwischn
de Volksgruppn im Urt
hot kana woas geton,
ka Politika hot driba gredt…
KARNTNERRISCH
Karntnerrisch,
dos greift auf`s Gmüat,
dos greift auf`n Vastond,
dos greift noch de Seen,
dos greift noch de Berg,
dos greift noch de Ondasdenkende,
da Jauchza is a Schrrroooaaa
der nit vahollt,
jo grüaß enk gooott…
KARNTNALOND
A jede Partei hot gsogt,
es geaht ihr ums Karntnalond,
um de Karntna Seen,
um de Karntna Berg,
um de Karntna Leit und
um de Karntna Kasnudln…
OTTO
Gott
Ott
Otto
Ogottogott otto
Grüaß gott
Grüaß otto
Karntnerisch
Karntnerisc
Karntneris
Karntneri
Karntner
Nerisch
Erisch
Risch
Isch
Karntnerisch
Jo grüaß enk gott
Otto
WOHLWREBUNG I
De Wohlwerbung is ka
Wettstreit um de bestn Leit,
bestnfolls a Streit um
den bestn Spruch,
den scheanstn Kanditatn,
aufn scheanstn Plakat.
Vur da Wohl hot mon
entlong da Schtroßn,
aufn Gemeindeplotz,
vurm Einkafszentrum,
Tofln mit de
Politikagsichta aufgstöllt.
De Eifrign hom a om
Friedhof Plakatstända hingstöllt…
WOHLWERBUNG II
De Partein hom
de scheanstn Plätz fir
ehrne Vaonstoltungen obgsperrt,
de bestn Musika spüln auf,
de feinstn Gosthaisa san
fir se resaviert.
De scheanstn Postn wearn
on de Funktionäre vagebn.
Dos Lond gheart dem Volk…
PROFIL
Vur jeda Wohl hom
de Politika neiche
Orbatsplätz vasprochn,
von Joahr zu Joahr sans
weniga woarn. De Woar is
in Fern Ost billiga hergstöllt
woarn. Fir de Fabrik hots ka
Förderung mehr gebn.
Do hom de Urtspolitika gmant,
mit da Kultur kennt da Urt
a neichs Profil kriagn…
KULTUR
Nochn Aufhängan
von de Werbeplanen
da Karntna Brauerei und
da Raiffeisenkassa im Kultursool
und noch da Valeihung
da Urkunde firn bestn Speck,
is de Kulturwochn im Kulturhaus
feialich eröffnet woarn.
Om Lond
hom in de Gosthaisa
Büldaausstellungen
Saison ghobt.
So belebt der Frauenakt
den Verzehr von Blutwurst
und Zweigelt blau…
KULTURTOGE
SPROCHKULTUR
MUSIKKULTUR
ESSKULTUR
TRINKKULTUR
BAUKULTUR
KÖRPAKULTUR
SPECKKULTUR
OBSTKULTUR
NOKTKULTUR
INTERNETKULTUR
PFLONZNKULTUR
MODEKULTUR
WEINKULTUR
SCHTERBEKULTUR
DOS BUFFET IS ERÖFFNET…
DORFPLOTZ
Da olte Dorfplotz is vakemman,
neamd mehr hot auf ehn gspült,
von de laarn Haisa is
da Vaputz obablattlt.
De Leit san in de neichn
Wohnblöck om Ortsrond
gezogn, de Gschäfta ins
neiche Gemeindezentrum
mit Parkplätz vur da Tir.
De Staudn und dos Groas hot
sich Stick fir Stick iban oltn
Dorfplotz ausgebratet.
Wia mehr Gäst ins Dorf
kemman san, hot man gmant,
da olte Dorfplotz kehrat saniert,
er war woas zan herzagn.
De Haisa rund uman Plotz san
außn mit kräftige Foarbn
ongstrichn woarn.
Mit Asphalt homs olls zuadeckt
und drauf de Betonträg fir
de Bluman gstöllt.
Za Eröffnung vom Dorfplotz,
mit Musi und Biar, san de Leit
von ehrne Wohnblöck kemman.
A poar Stundn woarn olle lustig,
donn sans wieda zruck in ehrne
neichn Wohnungen.
Dogebliebn is kana…
DONK
Bei ana Bürgavasommlung
iba de Umweltbelostung,
hot sich da Werksdirekta
ba da Bevölkerung bedonkt,
doß se johrzehntelong de
Obgase gschluckt hom.
In an jedn Schwammalan
is a bißl Blei,
a bißl Cadmium,
dos Gift hot sich im
Lebn eingnistat…
FASSADN
Iba de Schlogzeiln in de
Zeitungen von da vaseichtn Erdn
oda von da schlechtn Luft hom
sich de Gemeindepolitika gärgat,
wos de Fassadn von de Haisa mit
siaße Foarbn onstreichn hom
lossn und do schaut jemond
hinta de Fassadn…
VAGIFTUNG
Wia de erstn Leit wegn
Bleivagiftung ins Kronknhaus
gschickt san woarn hot mon
gsogt, in ondre Industrieurte is
de Vaschmutzung vül schlimma.
Nur an Noman hot kana gwußt…
SANIERUNG
Iba de Berichte
im Fernsehn von da
vaseichtn Erdn hom
sich de Gemeindepolitika
gärgat, wo mon ban
Hinschaun nix gmerkt hot.
A poar Joahr späta hom
de Gemeindepolitika driba
gschimpft, dos des Göld
fir de Bodnsanierung nit
auszohlt woarn is…
ENTSORGT
Wias unmöglich woarn is
vur de Leit zan vatuschn,
doß de Erdn vaseicht is,
hot mon gsogt,
de Erdn weard entsorgt,
umwöltfreindlich…
BÜRGABEWEGUNG
Mir schimpfn iba de
Fabrikn de des Wossa
und de Luft vaschmutzn,
iba de ibaflissign Sochn
in da Wohnung.
Om longan Einkaufssomstog
sama zan Einkafn in da Stodt.
Da Sprecha von da
Bürgabewegung gegn de
Müllvabrennung hot im Werk
a Orbat kriagt,
do hota gmant, de Obgase
wearn ibaprift…
KLANIGKEIT
Auf da Bundesschtroßn san
de Leit om Gmischtwoarngschäft
vurbei zua de Einkaufscenta
in de Stodt gfoahrn,
imma weniga san steahnbliebn.
Wias Gmischtwoarngschäft
wegn zwenig Kundschoft
zuagsperrt hot,
hom de Leit geklogt,
mir miasn wegn jeda
Klanigkeit in de Stodt foahrn…
URTSKERN
Wia de Wend von de Haisa
mit siaße Foarbn ongstrichn
san gwesn und do Dorfplotz
von de Postkortn obagstrohlt hot,
hot mon sich ums Lebn
hinta de Wend nimma kimmert.
Aus de oltn Haisa
im Urtskern san de
Einheimischn auszogn,
es woar ka Bod und ka Kloo
in de Wohnungen.
Iba de Auslända de in
de oltn Haisa einzogn san
hot mon gsogt,
se nehman in de Einheimischn
de Wohnungen weg…
URTSBÜLD
Nochn Toad vom Monn
is mitn Hund allan in
da Wohnung gsessn.
Wias auf ehm nimma
zan schaun hot ghobt,
hot se sei selba a
nimma hergrichtat.
De vakummene Weis
hot de Dorfleit gstört,
des passt nit zum
neichn Urtsbüld…
URT
Unta da Urtstofl homs
dos Schüld Ferienurt
ongschraubt, so semma
za an Fremdnvakehrsurt woarn.
Da Vota, da Großvota und
da Urgroßvota san stolz auf
senre Orbatahänd gwesn
und de Orbat in da Fabrik…
WONNS FRUHJOAHR KIMMT . . .
FEIA
Za hundat Joahrfeia
von da Lokalbohn san
de Ehrngäst mit an Sondazug
zan Frühschoppn kemman,
da Birgamasta hot
se begriaßt.
Drei Monat späta hot
da Aufsichtsrot gsogt,
de Bohnstreckn is nit rentabl…
FRUHJOAHR
Wonns Fruhjoahr kimmt,
de Költn vaschwind,
dos Eis schmülzt,
da Schnea vur da Tir
vageaht, donn liegt
do da Liabstram,
dos Wunschkind,
de Hochzeitsreise.
Dos Allansein vur
de Tir ausestölln,
weil Flohmorkt is…
GREAN
Nebn da Autobohn
fongan im Fruhjoahr imma
weniga Bama zan greanan on.
Olle Joahr wearn de
kronkn Bama gschlägat.
In de Onsprochn von de
Politika san de Wörta mit
greana Foarb ongstrichn.
Nebn da Autobohn
wearn imma mehr
Lärmschutzwänd aufgstöllt,
imma weniga sihgt
ma vom Lond.
Des kimmert eh kan,
de do durchrasn…
SCHTROSSN
Gegn den Bau ana
Schtroßn durchn Auwold
hom sich olle gwehrt.
Za jeda Bürgavasommlung
san de Leit kemman,
oba jedsmol weniga.
De Politika hom zuagwortat,
wia nur mehr a poar kemman
san homs gmant,
es san eh olle dafir…
SCHÜTT I
Da Berg hängt
tiaf üba deina,
a schwoarze Furchn
durchziaht di da Längs.
Du host jezan a ehlane
und a hiagare Seitn.
De Bachln homs in
Betonrähr einegezwengt,
firn Lärm von da Autobohn
gibt’s ka Grenz.
Meine Tram san auf
da ehlan Seitn,
i bin von meine Tram getrennt…
(Schütt – Naturpark Schütt)
SCHÜTT II
A Maschnzaun wo mon
friha frei geahn hot kennan,
vül Lärm und Autos,
wo mon friha
allan sein hot kennan,
vül Asphalt und Beton,
wo friha de Hopfnbuchn
gwochsn san…
SCHÜTT III
Ssst, ssst, ssst…
Hintan Wüldzaun steahn,
de Sunn scheint ma
ins Gsicht.
Zwischn hiagan und
ehlan Wüldzaun foahrn
de Autos wia in an
großn Käfig dahin.
Ssst, ssst, ssst…
Ols Bua bin i gern in de
Tierschau Offn schaun gongan.
Hinta da Autoscheibn
ziagn de Leit
olle mäglichn Gsichta.
Ssst, Ssst, Ssst…
DRAUTOL
Von da Sunnseitn ins Tol
obeschaun, sehgn wia de
Lostwogn den Sond
und den Zement ibas
Feld zu de Kroftwerksbaustelln
fihrn. Om Tolbodn
homs de Blechhüttnan
aufgstöllt und de Bagga orbatn
bei Tog und ba da Nocht.
Inmittn vom Tol is a offene
braune Wundn, de Schroa von
de obgholztn Bama
und Streicha steign vom
Tolbodn in de Sunnseitn aufa.
Dos Rauschn da Drau,
dos i gheart hon,
wonn i aufgstondn
und wonn i schlofn gong
bin is vastummt. Jetzt liegt de
Drau stüll und miad im Bett
und man waß nit,
ob ihr Schterbn schoan ongfongan
hot…
MADL
A Kindawogn mit
an liabn Madl,
a Muata mit
an schean Gsicht.
Rechts und links Birkn
mit greane Blattln,
a leichta Wind.
Bluman in olle Foarbn,
im Brunnan spiaglt sichs Gsicht.
De Polman toans vom
Gwächshaus ausa stölln,
de Sunnanstrohln färbn
de Wangalan roat.
Bam Hamfoahrn hot a Auto
den Kindawogn ibarollt…
OSTAN
De Leit san vur
da Kirchn gstondn,
iba de Friedhofsmawa
is da Obnd kemman,
a kolta Wind hot de Leit
tiaf in Rock einekrichn lossn.
Dos Ostafeia hot gebronnt,
de Leit hom ehrne Kerzn
onzünd und san in de
finstre Kirchn einegongan.
In da Kirchn is es nie
gonz hell woarn…
TOURISMUS
SUMMATOURISMUS
WINTATOURISMUS
BERGTOURISMUS
SONFTATOURISMUS
SEXTOURISMUS
KULTURTOURISMUS
SPROCHTOURISMUS
BODETOURISMUS
SCHITOURISMUS
MÜLLTOURISMUS
BABYTOURISMUS
SINGLETOURISMUS
SENIORNTOURISMUS
INDUSTRIETOURISMUS
URLAUB BEI FREUNDEN…
SUMMA
Im Summa weard olls zua da
Untaholtung fir de Fremdn getoan.
In an Seeurt feians zwoamol
Kirchtog im Joahr.
Im Summa fir de Fremdn,
im Hearbst fir de Einheimischn…
KIRCHTOG
Aufn Kirchtog,
de Hitz des heit hot,
a kolts Bier is jezan dos Richtige.
Du woarst lustiga ols mir,
seit drei Joahr woarst
schoan kronk,
om Bluat und on da Seel.
Du host gwußt dei Lebn
is bold zan End.
Wonn fongt de Musi zan
spüln on?
Uns woar longweilig, weil
fir uns a nächsts Joahr
wieda Kirchtog sein weard…
FREIBOD
A Sunntog mit Temparaturn
iba dreißg Grad,
vurm Freibod gibt’s
kan frein Parkplotz mehr.
Olls nehman de Leit
ins Bod mit:
Dos Radio, de Spülkortn,
de Tante, de Jausn.
Durt hot olls sein Plotz,
de Klankinda beim Planschbeckn,
de Buam und Madln bei da
Wossarutschn, de Dorfscheanen
auf da Sunnenbonk,
in da Nähe de Burschn
und de oltn Herrn,
de Pensionistn sitzn im Schottn.
Im ibafülltn Freibod noch
dir zan suachn onfongan,
de laare Deckn von dir findn
und wiaßn, dos du glei
kemman wearst…
OLLASÖLNTOG
Da Ollasölntog woar
a woarma klora Herbsttog,
mir woarn im Wold vom Kaisatol,
ka Vakehr, ka Lärm, a Ruah.
Da Bawa hot mitn Ruckkorb
dos Laab in Schtoll einegetrogn,
im Hausgartl hom noch
de Bluman geblieht
und du woarst bei mir…
IBAN WINTA
Iban Winta hot da Oltbawa
nit vül Möglichkeitn ghobt
za Untaholtung.
Wenna vurs Haus ausegongan is,
is ehm glei amol kolt woarn,
a de Fiaß hom ehm weah toan.
Vurm Eis auf da Schtroßn
hota a muads Ongst ghobt,
sei Stock hot do a
nit vül gholfn. Om liabstn
isa in da woarman Kuchl gsessn,
hot sein Schnopstee getrunkn
und a bissl Radio glosnat.
Oft hota za seina Frau gsogt,
im Fruhjoahr deis wieda
bessa wearn,
im März isa gschtorbn…
SCHNEA
Olls hot mon om
Berg gebaut,
a neiche Schtroßn,
an Parkplotz und an
Schilift. An Schivaleih
im Tol, a Gosthaus om Berg.
An Schlepplift und
a Märchnwölt fir de Kinda.
Dos ka Schnea kemman kennt,
dron hot kana gedocht…
MÖLLTOLLEITN
In da Mölltolleitn,
in da Sunneseitn,
steaht a olts Bawahaus
und a neicha Schtoll danebn.
De Christnocht is
kolt und kloar.
Da Bawa red mit
de Viecha im Schtoll,
de Kinda sitzn
bam Christbam in da Stubn…
CHRISTBAM
Von Joahr zu Joahr hom
aufn Christbam om
Morktplotz imma mehr
elektrische Kerzn Plotz ghobt.
Iban Weihnochtsvakehr homs
de Weihnochtsstern onbrocht.
Da Weihnochtsrumml
is mehr woarn,
de Zeit firn ondan weniga…
WEIHNOCHT I
Bei vüle Schaufensta vurbeigeahn,
bei sovüle Sochn nit wiaßn
woas schenkn, vülleicht
is dos Christkindl a Gutschein.
Im Lodn von da Caritas suacht
a Tirkin noch zwoa Pullova
fir ehrne Kinda…
WEIHNOCHT II
Wias om heilign Obnd
zan Schneibn ongfongan hot
und i mitn Auto nit za de
Vawondtn foahrn hon kennan,
do sans scheane Weihnochtn gwesn…
HEILIGN OBND
Om heilign Obnd
hots zan Regnan ongfongan,
da Regn hot in Schnea
und a de Weihnochtsstimmung
furtgschwemmt.
Umas Haus hots des
Grümpl ausagapert.
Im Haus san de oltn
Streitigkeitn zwischn de
Leit zan Vurschein kemman…
INHALT
AN SCHEAN TOG
Is erste Mol 6
Ausziagn 7
Allansein 8
Nocht 9
An schean Tog 10
Bsetzt 11
Grod 12
Liab 13
Somstognocht 14
Vawöhnt 15
Weitalebn 16
Wochn späta 17
Furtgeahn 18
Vota 20
Muata 21
Bsuch 22
Schterbn 24
Da Schroa 26
Schmerzn 27
Gloshaus 28
Shopping Centa 29
Nochboar 30
LIABE WÖLT, GUATE NOCHT
Martin 32
Sinn 33
Bairin 34
Rentn 35
Möslvota 36
Rauta Vota 37
Kaisa 38
Kriag 40
Katzlmocha 42
Flichtlingskinda 43
Flohmorkt 44
Foarbn 45
Kronk 46
Obnd 47
Vakaifarin 48
Spearmüll 49
Vagessn 50
Fuchzg Joahr 51
Dachau 52
Stein 53
ZWOATE HAMAT
Hamat I 55
Hamat III 56
Mocha 57
Zwoate Hamat 58
Vaständigung 59
Karntnerrisch 60
Karntnalond 61
Otto 62
Wohlwerbung I 63
Wohlwerbung II 64
Profil 65
Kultur 66
Kulturtoge 67
Dorfplotz 68
Donk 70
Fassadn 71
Vagiftung 72
Sanierung 73
Entsorgt 74
Bürgabewegung 75
Klanigkeit 76
Urtskern 77
Urtsbüld 78
Urt 79
WONNS FRUHJOAHR KIMMT
Feia 81
Fruhjoahr 82
Grean 83
Schtroßn 84
Schütt I 85
Schütt II 86
Schütt III 87
Drautol 88
Madl 90
Ostan 91
Tourismus 92
Summa 93
Kirchtog 94
Freibod 95
Ollasölntog 97
Iban Winta 98
Schnea 99
Mölltolleitn 100
Christbam 101
Weihnocht I 102
Weihnocht II 103
Heilign Obnd 104
